sama, sama

Eins og sjá má gerist ekkert voðalega mikið hérna núna þessa dagana. Strákarnir bíða bara eftir að það komi páskafrí, Palli í Texas og ég ekkert að gera af viti. Ég er ennþá að jafna mig í veskinu eftir sýninguna fínu og dunda við í rólegheitum að sauma úr því sem ég verslaði. Veit ekki hverskonar lægð ég fer alltaf í þegar Palli fer eitthvað, tekur alltaf tíma að venjast þvi að hann sé heima og svo aftur þegar hann fer. Meiri vitleysan. Jæja en svona er þetta bara.

Smá fyrirspurn hér:

Kunningjakona mín var að skilja og er að flytja í íbúð 1. maí. Hún bað mig að koma þessu á framfæri:Mig vantar ýmislegt og fjárhagurinn leyfir víst ekki "allt nýtt" þó það sé draumurinn (hvern dreymir svo sem ekki um það). Þætti mér vænt um ef þið vitið um fólk sem er að endurnýja innbúið eða bara eiga hluti sem það vill losna við, þá má alveg benda á mig sem góða hirðirinn, hvort sem hlutirnir eru gefins eða seldir (ódýrt). Eftirfarandi vantar mig sérstaklega:

Borðstofuborð/ eldhúsborð og stóla (helst ljóst á litinn en skoða allt)
Sófa, helst hornsófa eða tungusófa eða sófasett, skoða allt
Ísskáp með frysti, svona tvískiptan, ísskáp að ofan og frystir að neðan
Rúm fyrir strákinn (hann langar voða í svefnsófa)
Rúm fyrir mig (breidd ca. 160)
Hillur fyrir þau bæði
Skrifborð (og skrifborðsstól) fyrir strákinn
Sjónvarp, vídeó og DVD
Svefnherbergisská pa
trip trap stól
Lampa og ljós


Með fyrirfram þökk.


Ef þið vitið um einhvern sem þarf að losna við eitthvað af þessu þá skrifið mér og ég læt hana vita.

helgin

Næturgestirnir fóru nú fyrst á laugardagskvöld og þá ákvað AKH að hann ætlaði að sofa heima hjá Brandon. Það var nú betra en að hafa þá alla aftur svo það var óvenju hljótt það sem eftir var kvölds. Alexander og Brandon eru núna í sundi svo það er greinilegt að strákurinn er komin með fullt af vinum og leiðist vonandi ekki hér eftir.
Nú ég fór á laugardagsmorgun á BQE og var komin niðureftir kl 11. Byrjaði á að skoða öll fallegu teppin sem voru uppstillt og fór svo kl. 1 til að selja miða fyrir quilt klúbbinn minn. Við vorum með 1 af fallegustu teppunum í vinning, (er teppið til hægri á myndinni) en það voru 5 teppi í allt. Eftir klukkustund þar fór ég aftur niður til að sjá restina af teppunum sem voru á sýningunni og versla “smávegis” í básunum sem voru með allt frá efnum til skartgripa og máluð kort og hvað veit ég til sölu. Ég sá fram á að bæði fæturnir á mér og buddan yrðu frekar slöpp ef ég yrði of lengi svo kl. 4 hringdi ég í Palla og sagði að hann yrði að sækja mig sem fyrst eða við yrðum að sækja um styrk til ríkisins fyrir mat, (buddan orðin frekar létt). Ég var svo upptekin þegar ég kom heim að það var bara eins og eftir góðan túr í kringlunni eða smáralind svona til að þið getið ímyndað ykkur tilfinninguna. Svo þurfti nú að fæða alla þessa gaura áður en þeir fóru svo það var nóg að gera. Nú í morgun sá ég svo að kona hafði auglýst svefnsófa gefins ef maður gæti sótt hann og þar sem maður sér nú fram á að fá kanski gesti í heimsókn, allavega Ásta Björg á eftir að koma þá hringdi ég í hana og við fórum svo áðan og sóttum þennan líka fína svefnsófa. Sóoo ef einhver er að huga að heimsókn, verskú fínt rúm að sofa í.

myndir

Loksins eru þessar myndir að komast í albúm hjá mér. Hefur tekið ansi langan tíma, en svona er þetta bara. Reyni að setja fleiri á eftir eða morgun þar sem netsambandið er frekar lélegt svo ég gafst upp á seinni helmingnum, tók svo langan tíma. Hefur einhver tekið eftir að ég er kattakona??:-)
Þá er komin helgin með quiltsyningunni hérna í Broward (http://www.browardquiltexpo.com/). Það byrjaði í gærkvöldi á fyrirlestri og verður svo syning og workshops í dag og á morgun og líkur svo á sunnudag. Reikna með að vera þar allann morgundaginn.
Hér var allaveg þröngt á þyngi hjá Alexander í nótt þar sem hann hafði hvorki meira né minna en 3 næturgesti. Þeir voru allann gærdaginn að leika sér þar sem var frí snemma úr skólanum og frí í dag, ekki spyrja mig hversvegna, hef ekki hugmynd. Og það var svo gaman hjá þeim að þeir eru hér bara enn. Fínt fyrir AKH.

allt í góðu

Stefán Örn komin heim heill á húfi og með bikarinn sinn og farin að plana næstu ferð. Þar sem hann komst áfram núna fer hann í international keppnina sem verður í enda april. Ekki laust við að maður sé stolt af stráknum, enda alveg leyfilegt. Það eru ennþá Fcat próf hjá Alexander, sem eru svona Florida standard próf, ekki tekin annarstaðar í USA. Honum gengur vel í prófum eins og vanalega og stærðfræðikennarinn búin að mæla með að hann fari í "advandced" ( nú er að vona að ég geti skrifað þetta rétt, en þýðir held ég að hann fari bekk ofar í því) stærðfræði á næsta ári sem er allt í lagi mín vegna, er búin að segja honum að hann verði samt að vera duglegur að læra heimalærdominn, sem er alltaf það erfiðasta.
Ég búin að fara til læknisins með brjóstamyndirnar og hann sagði að allt liti vel út, bara fylgjast með því. Fer aftur í myndatöku eftir 6 mán. Bakið bara með skásta móti núna svo maður getur þó allaveg hreyft sig aðeins meir, sem er náttúrulega líka gott fyrir bakið. Meiri hringavitleysan. Semsagt allt í góðum gír og meira að segja sólin farin að skína.

allt á fullu

Jössus, litla barnið mitt ( sem er auðvitað talsvert hærri en foreldrarnir í cm) er farin af stað til Orlando. Hann kemur ekki heim fyrr en á sunnudag og ég finn nú alveg hnútinn í maganum eins og þegar hann fór í útilegu (hyttetur) með skólanum í DK hér fyrir nokkrum árum síðan. Vona bara að hann komi slysalaust heim frá þessari ferð. Þetta er stór hópur af krökkum frá mörgum skólum í Florida sem tekur þátt í þessari keppni og vonandi verður þetta bara gaman hjá þeim. Það þurfti að fara og versla jakka og aðrar buxur og skyrtu handa herramanninum því hann þarf að vera fínt klæddur í keppninni þar sem þetta er keppni í hinum ýmsu greinum tengdum “buisness” (veit ekki alveg hvernig maður þýðir það) þá verður klæðnaðurinn að vera í stíl. Hann er semsagt með fulla tösku af stífpressuðum og straujuðum fötum. Jæja nóg um það reyni að halda í mér að hringja ekki of oft. Guð sé lof fyrir farsíma.
Annað er það að frétta að Palli kom heill heim á mánudagskvöld með fullt af hangikjöti, flatbrauði og rauðum ópal. Meira að segja flugið næstum klukkutíma á undan áætlun. Hef nú ekki vitað það áður hjá Icelandair.
Nú Alexander er að fara á skemmtikvöld á morgun svo það er nóg að gera hjá þeim strákunum. Hann er greinilega búin að eignast góðan vin þar sem Lee kemur oft með honum heim og þeir skemmta sér vel saman.
Ásta Björg, já hvað er að frétta af henni. Maður nær varla sambandi við hana það er svo mikið að gera, bæði í skólanum og í félagslífinu svo það er vonandi allt í góðum málum þar. Ekki skrifar hún neitt á þessa bloggsíðu sína svo ekki fréttir maður neitt þar. Maður verður að toga úr henni hvert orð ef maður kemst loksins í samband.

fyrirlestur

Ég fór í gærkvöldi á fyrirlestur hjá CSQ (coral Springs Quilters) með Joan Shay sem gerir þau fallegustu og líflegustu blóm og fugla á quilts sem ég hef nokkurntímann séð. Þar fyrir utan var hún hress og skemmtileg að hlusta á. Það er “workshop” í dag þar sem hún kennir hvernig á að vinna þetta og hefði nú verið gaman að fara þangað en finnst það of langt fyrir strákana að vera eina heima í allann dag, hrædd um að þeir gleymi að borða og svona ef þeir fá að vera eftirlitslausir í tölvu heilan dag. Allavega komin með bókina hennar svo ég get nú alveg reynt að gera svona sjálf.
Ég er líka formlega orðin meðlimur í Coral Springs Quilters sem mér líst alveg rosalega vel á , fullt að skemmtilegu fólki.
Bakið er þokkalegt meðan ég tek nógu mikið af verkjalyfjum svo nú geri ég það bara, allt til að geta verið á róli.

hækkandi sól :-)

Þá er ég komin með þessar líka fínu myndir innanúr bakinu á mér. Ekki get ég nú lesið neitt úr þessum myndum en heldur ekki ætlast til að svona venjulegt fólk skilji þetta. Ég sé allavega að ég er með hrygg og eitthvað meira af beinum þarna, hvort þau eru eins og þau eiga að vera fæ ég að vita þegar læknirinn skoðar þær næsta fimmtudag. Næsta vika verður semsagt enn ein læknaheimsóknavikan, fyrst er það brjóstaskurðlæknirinn og svo beina sérfræðingurinn. Æji vona að þessu fari nú að ljúka.
Annars er nú að verða bjartara yfir florida og aðeins að hækka hitastigið eftir kuldakastið.
Ég dreif mig á fund með föndurkonum hverfisins og skemmti mér konunglega og ákveðin í að fara þar oftar. Þær hittast einu sinni í mánuði eins og quilt konurnar, bara vikunni á undan svo það getur ekki verið betra. Í kvöld er aukafundur í quilthópnum þar sem kemur gestakennari. Það verður fróðlegt að heyra hveð hún hefur að segja.

Var að lesa skemmtilega grein um raðara (filers) og hlaðara (pilers). Skilgreiningin er sú að raðarar eru mjög skipulagðir og hafa allt í röð og reglu, allt raðað vel í nærfataskúffunni þeirra, fötunum raðað eftir lit og dósamatur í stafrófsröð í hillunum. Hlaðarar eru ..hm já hlaðarar, ekkert hægt að lýsa því betur. Ég tilheyri óumdeilanlega seinni hópnum.
Konan sem skrifaði var að gefa góð ráð um tiltekt, gott mál það. Þar sem ég er búin að eyða heilli helgi í að taka til í pappírum sem samkvæmt fyrri skilgreiningu voru að hlaðast óhuggulega upp hjá mér fannst mér upplagt að reyna að fá smá “tip” frá þessari góðu konu sem greinilega hafði rannsakað þetta fyrirbæri vel. Semsagt núna eru pappírarnir mínir eins og heima hjá raðara en hversu lengi það helst er ekki gott að segja. Allavega nýt þess meðan það helst. Næsti staður til að rannsaka og fá tip um er þvottahúsið þar sem fjallið “ófrágengin” er að verða ansi hátt og hætta á skriðuföllum ef heldur fram sem horfir.

læknaspjall eða þannig

Jæja 1 af mörgum læknaheimsóknum búin og ekki svo slæmt. Fór til læknisins í morgun með öxlina og tók bakmyndirnar með mér, aðeins að kvarta yfir því líka þar sem það er mikið verra en öxlin. Hann tók röntgenmyndir af öxlinni og var ekkert alvarlegt að sjá, smá skekkja á litlu beini, en hann vill samt að ég fari í sjúkraþjálfun með öxlina, ok gott mál með það. Svo var það bakið sem er orðið það slæmt að ég get ekkert gert af viti. Þó hann taki nú yfirleitt ekki sjúklinga með bakverki þá kíkti hann á myndirnar og gaf mér svo vottorð í MRI og fékk ég tíma í það á fimmtudag, ekki löng bið það. Á að fara til sjúkraþjálfarans líka á fimmtudaginn svo vonandi fer nú eitthvað að gerast með þetta leiðindabak mitt. Er orðin frekar leið á þessu hreyfingaleysi.
Það var sami kuldinn í nótt og Stefán Örn greyið komin með kvef, samt lét ég undan og setti hita á stofuna í gær. Held hann hafi fengið þetta í gær þar sem hann fór hjólandi í rokinu til skólafélaga að gera eitthvað verkefni. Vona að það batni nú fljótt. Alexander er búin að vera alla helgina og í dag þar sem er frídagur hér að gera 1 lítið verkefni fyrir skólann en hann er nú ekki mikið að flýta sér frekar en vanalega að gera heimavinnu. En þetta þokast allt í rétta átt hjá honum þó hægt fari. Ferðatölvan er búin að vera að stríða mér með að fara ekki í gang “blue screen of death” svo það hefur dregist að ná í þessar myndir sem eru auðvitað þar. Þetta kemur allt vonandi með hitanum sem þeir eru búnir að spá að sé nú loksins að koma.

pappírsflóð

Ég get svarið fyrir að það væri hægt að kynda heilt hús í viku ef ekki mánuð á öllu þessu pappírsflóði sem er að kæfa mann. Ég eyddi öllum deginum í gær í að fara í gegnum pappíra sem voru bókstaflega að yfirtaka húsið, voru alstaðar. Held meira að seggja að þeir finni sér felustaði sjálfir, allavega stundum einkennilegir staðir sem maður finnur hina ýmsu pappíra. Sé að það þarf virkilega að kaupa annan "file" skáp. Mér varð hugsað til þess er ég fór með Libby til nágranna hennar eftir Wilmu að ná í mat sem hún hafði fengið að geyma þar í frysti. Frystirinn var í bílskúrnum hjá þeim og maður þurfti að skáskjóta sér milli skjalaskápa til að komast að frystinum sem var í einu horni bílskúrsins. Og þeir náðu alveg upp í loft líka, í þessum tvöfalda "bílskúr", sem var það náttúrulega ekki lengur því það hefði ekki komist leikfangabíll þarna inn. Bískúrinn var semsagt orðin skjalageymsla. Ég er semsagt búin að fylla minn litla einfalda skjalaskáp og sé að ég verða að fjárfesta í öðrum ef ég ætla að hafa pappírana á vísum stað í framtíðinni. Kanski verð ég að fá mér tvöfaldann bílskúr seinna meir til að geyma alla skjalaskápana, hver veit.
Nú veðrið, verður maður ekki alltaf að segja smá veðurfréttir líka, ha? Hér er semsagt búin að vera ferlegur kuldi á næturnar og ekki laust við að það sé enn frekar kalt og ekki bætir havaðarokið sem er að ganga yfir núna. Sólin er samt eitthvað að reyna að bæta úr þessu og skilst mér að það eigi eitthvað að hlýna á morgun. Vona það því það verður svo ferlega þurrt loft hér þegar það kólnar að maður er þurr ofan í ra...

köld helgi

Jæja þá er Palli á leið til Orlando frá Tampa. Hann var að vinna þar í gær og fer svo í flug í kvöld til Íslands. Miðað við kuldann hér í morgun er örugglega jafnkalt í Orlando og á Íslandi, eins gott að hann er með hlý föt með sér. Ég er allavega komin í peysu, nenni nú ekki að setja hitan á, það verður alltaf svo vond hitalykt þegar maður notar hita svona sjaldan. Það er þó allavega sól úti svo það ætti að hitna aðeins þegar líður á daginn.
Ég fór eina ferðina enn í mammó í gær og það virðist ekki vera breyting síðan í september svo vonandi er ekkert að gerast þarna. Fer til sérfræðingsins í enda mánaðarins svo þá fæ ég að vita eitthvað meir. Þessum læknaheimsóknum mínum ætlar seint að ljúka og er ég að verða frekar þreytt á þessu en næst fer ég á mánudag til að láta skoða öxlina og bakið og vona að ég fái nú að fara í sjúkraþjálfun þar á eftir svo ég geti farið að gera eitthvað sjálf. Þori voða lítið að hreyfa mig, er svo hrædd um að bakið fari alveg eins og í haust.

já já leti og ...

Ok veit að það er alveg orðið skammarlega langt síðan ég skrifaði síðast, en svona er þetta bara. svona er þetta bara.
Við fórum semsagt familien til Íslands um hátíðarnar og var það virkilega góð ferð. Gaman að sjá alla stórfjölskylduna, og öll nýju börnin. Veðrið var líka alveg þokkalegt meðan við vorum, fengum að sjá smá snjó sem var nú allt í lagi meðan það var ekki meira en þetta. Öll komumst við svo klakklaust heim aftur og allt komið í fastar skorður aftur.
Ásta Björg komin á fullt aftur í skólanum í Scotlandi og strákarnir hér. Strákarnir loksins farnir að eignast einhverja vini hérna, sem betur fer. Alexander farið að ganga líka betur í heimavinnunni þó það sé erfitt að fá hann til að sitja kyrran við það. Stefán Örn gengur líka vel í skólanum. Kom með bikar heim þar sem hann er með í fylkismóti sem DECA http://www.fldeca.org/con_scdc.htm heldur í Orlando í mars. Það verður vonandi gaman fyrir hann. Er að reyna að koma myndum á myndasíðuna frá Íslandsferðinni og eitthvað fleira kanski.

þyrfti að hafa sjálfvirka skrifvél

Veit það. Agaleg ‘’pennaleti’’ hérna, eins og ég sagði við Ástu Björg er ég illa haldin af CCF svo þessvegna er ekki mikið pikkað þessa dagana.
Hér er annars alltaf það sama að frétta, strákarnir í skólanum og ég að klebera úr leiðindum hérna heima. Við drifum okkur annars i bíó á sunnudaginn svona til að komast út úr húsinu. Sáum Open Season, teiknimyndina, alveg hægt að hlægja að henni. Alexander farin að bíða eftir afmælisdeginum enda farið að styttast. Alltaf sama vandamálið með hvað á að gefa börnunum. Alveg með grænar af þessu tölvudóti og spilum sem alltaf er efst á óskalistanum.
Helstu fréttir eru að ég er loksins búin að vesla farmiðana til Íslands um jólin, þorði ekki að bíða lengur með það, hætta á að allt verði uppselt um jólin.

lítil stúlka fædd, en gaman

Já hún Bidda eignaðist stelpu 12. september, sem betur fer ekki 11. Gekk illa og seint en dafna báðar vel núna .
Annars allt gott að frétta héðan, meira að segja veðrið bara þokkalegt, sundfært.
Loksins búið að fata AKH upp líka, hann var smá abbó út í SÖH sem fékk fullt af fötum. Var greinilega orðin nauðsyn því hann komst ekki orðið í neinar buxur, allar of litlar, er farin að nota sömu stærð og Stefán Örn. Var að hugsa um að setja upp svona gullkorna síðu, þeir eru alltaf að segja eitthvað svona skemmtilegt, stundum kanski út af málaruglingi. Eins og í fyrradag þegar við Alexander fórum í fataleiðangurinn og á leiðinni heim var ég eitthvaðað tala um að þeir bræður væru að verða í sömu stærð, og hvort hann væri ekki ánægður með að vera að stækka. Þá segir Alexander'' nei, það er bara af því að Stefán Örn er svo þunnur, þessvegna erum við í sömu stærð''. Greinilega verið að hugsa um enska orðið thin sem er grannur og bara þýtt beint yfir. Gaman að þessu

frettir eða frettaleysi??

Búin að fá bátaskírteinið loksins, voða flott. Nú vantar bara bátinn :-)

Jæja komin tími á að skrifa eitthvað þó að það sé nú ekkert sérstakt svosem að skrifa um.
Ásta Björg farin heim aftur, sakna hennar alveg um leið. Hún segist vera búin að mála nýja herbergið sitt og vonandi komin með rafmagn núna og búin að koma sér fyrir. Strákarnir á fullu í skólanum og SÖH duglegur að vakna ca kl 6.30 á morgnana og hjóla í skólann. Semsagt allt í föstum skorðum.
Ég eignaðist gamla saumavél um daginn, vildi að ég hefði gömlu saumavélina hennar mömmu hérna líka, langar eiginlega í fleiri, er þetta della eða hvað??? :-Þ
Jæja en er semsagt að gera upp þessa gömlu vél, þvo og smyrja og setja saman, bara nokkuð gaman. Er aðeins að sauma líka, auðvitað, og reyni að setja myndir af þessu öllu við tækifæri.
Fór í mammo í gær en varð að fresta bakmyndatökunni þar sem AKH var veikur í skólanum svo ég varð að sækja hann, ekkert alvarlegt samt. Verst að hafa ekki gömlu b...myndirnar til að bera saman. Nú verð ég að fara í ultrasound líka til að vera viss um að allt sé í lagi.
Datt í hug þegar ég var í myndatökunni í gær og konugreyið var að kremja á mér brjóstin að þetta væri ekki svona vont ef karlmenn væru með brjóst. Getið þið ekki ímyndað ykkur ef að karlmaður þyrfti að setja punginn á sér í svona klemmu að það væri búið að uppfinna eitthvað betra tæki fyrir þetta, ha, ha ég spyr. Verið vissar um það.

rok, rok, rok

Þá fer fríið hennar Ástu Bjargar að taka enda. Það er búið að vera gott að hafa hana hér og hún búin að versla alveg heilan helling. Hún er þó búin að ná að fá smá lit á sig núna ekki eins og síðast þegar sólin var í fríi. Reikna með að við keyrum til Orlando á laugardag og gistum þar, flugið hennar er á sunnudagskvöld.
Strákarnir eru búnir að vera í fríi í skólanum í gær og í dag vegna TS Ernesto, sem er svo ekkert nema smá rok sem betur fer. Palli kom fyrr heim í gær til að setja allt laust í bílskúrinn en við Ásta Björg fórum í ´´Kringluna´´. Já ég get svarið fyrir að við skelltum okkur í mallið og þetta er sú besta búðaferð sem ég hef farið í. Það vara svo fátt fólk að það lá við að það væri tómt, það voru þó nokkrar hræður í innkaupaleiðangri sem hafa greinilega hugsað eins og við. Engin troðningur og engin hávaði, semsagt drauma búðarferðin.
Við reynum að halda okkur samt inni við í dag meðan restin af rokinu fer yfir.

skólinn byrjaður

Ásta Björg mætt á svæðið og veðrið bara gott, vona að það haldist allavega meðan hún er hér. Við keyrðum á laugardag til að ná í hana til Orlando. Það var smá hætta á að flugið væri seinkað þar sem allt flug er svona frekar seint núna. Var búin að segja henni að vera bara með það nauðsynlegasta í plastpoka í flugið þar sem ekki mátti hafa neitt með sér í flugvélina nema peningaveski, skilríki og miðann. Eins og við vorum sammála um að núna er líklega öruggasti tíminn til að fljúga milli landa. Jæja en hún kom aðeins seinna en áætlað með plastpokann J
Við vorum búin að panta hótel í Orlando þar sem bakveika konan treysti sér ekki í aðra bílferð sama daginn og krakkarnir ætluðu að koma við í Universal. Þar sem Sanford er ekki alveg í miðborginni, er reyndar lítill bær norðan við Orlando, þá var ákveðið að fara bara á hótelið og borða snemma slappa af og fara á sunnudeginum í Universal. Ég var nú bara merkilega liðug í bakinu eftir ferðina og hótelið á sunnudeginum, þó ég treysti mér nú ekki til að fara í neitt tæki, of mikið hopp og hoss. Við vorum fram eftir degi í garðinum og um 5 leytið var stefnan tekin á Miami. Það var nú gott að komast í sitt eigið þó ég verði nú að segja að ég er ekki viss um að nýlega dýnan mín sé nógu góð fyrir bakveikt fólk.
Strákarnir byrjuðu svo í skólanum í gær, Stefán Örn í High school og Alexander áfram í sínum middle. Stefán Örn hjólaði og þetta er ágætis hjólatúr á morgnanna fyrir hann en bara ein stór gata að fara yfir annars stígur alla leiðina. Hann þarf núna að vera komin í skólann fyrir 7.40, svolítið annað en í fyrra þar sem þeir byrjuðu klukkan 9. Alexander er ennþá kl 9 svo hann fær að sofa aðeins lengur en bróðir sinn, voða feginn því. Þeir komu heim í gær með tonn af pappír sem þurfti að útfylla svo ég sat í lengri tíma og las og fyllti út blöð. Stefán Örn fékk öll valfögin sín og þar á meðal financial computer (lauslega þýtt: fjármála tölfræði) sem er hluti af Academy of Finance. Þar sem hann fékk það fag þá verður hann að vera í DECA klúbbnum og þar verða menn að mæta í sparibuxum, skyrtu og með bindi svo nú verðum við að fara að versla fín föt á minn mann. Alexander hitti alla strákana aftur frá í fyrra, voða glaður og ég vona að hann fái nú einhverja góða vini til að vera með eftir skóla.

ekki alveg dauð

Þá er þetta legudæmi komið á aðra viku og ekki orðin nógu góð ennþá. Fékk semsagt svona líka í bakið að ég hef mig ekki hrært í heila viku, nema til að fara til læknisins og fá smá dóp til að geta verið til. Fannst ég nú ekki vera að gera neitt alvarlegt, saga eina litla grein úti í garði með Palla, sem betur fer var hann heima því það ætlaði nú bara að líða yfir mig af sársauka svo hann varð að styðja mig inn. Er búin að vera síðan á sterkum lyfjum og hitapoka, liggja eins og skata, frekar boring og finnst ég vera að fá legusár af þessu. Ásta Björg er að koma á morgun og ætlar að vera 3 vikur og vonandi verð ég ekki svona allann tíman. Frekar leiðinlegt fyrir okkur. En semsagt vona að þetta fari að lagast allavega þannig að ég geti gert eitthvað skemmtilegt með henni.

bara ekkert??

Þá er komin tími á að láta heyrast (eða sjást) smá lífsmark í suður Florida. Síðustu fréttir voru að Palli fór til Mobile, eina ferðina enn og er þar núna. Við 3 höfum dundað okkur aðalega inni þar sem veðrið hefur ekki boðið upp á neinar langferðir, eða stuttar heldur. Það er búin að vera þessi sami drungi yfir og eldingar og læti alltaf annað slagið. Loksins núna síðan á mánudag hefur veðrið eitthvað smá batnað svo vonandi er það góðs viti. Annars er ég líka búin að vera með verk í bakinu og liðirnir að pirra mig svo það er eins gott að fara varlega. Get ekki alveg hugsað það til enda að geta ekki saumað fyrir verkjum, svo verkjalyf, og krem og allt sem hægt er að nota er í notkun núna.
Síðan við komum heim hefur acið verið alveg að fara með okkur svo við kvörtuðum eina ferðina enn og loksins komu kallar í gær að setja nýtt. Ég hélt (reyndar þeir líka) að þetta myndi nú ekki taka neitt agalega langann tíma og við vorum jú að fara á bátanámskeiðið um kvöldið, þó að það hafi nú ekki verið í huga mér þegar þeir komu kl 9 um morgun. En 10 tímum seinna (þegar við áttum að vera mætt á námskeiðið) drögnuðust aumingja mennirnir loksins út búnir að vera að stanslaust að. Skápurinn sem tækið átti að vera í var svo þröngur að þeir þurftu að taka allt heila hollið í sundur og setja það saman inn í skápnum aftur, komst ekki inn öðruvísi. Við slógum því enn 1 hraðamet svo við gætum verið á seinni hluta námskeiðsins. Það var virkilega gaman og strákunum fannst mjög skemmtilegt að plotta kúrsa á kortinu og gerðu það alveg rétt. Þegar við komum heim virtist acið ekki hafa lækkað um 1 gráðu síðan við fórum, en þá var það á 84, hann sagði mér einmitt áður en hann fór viðgerðarmaðurinn að hann kæmi aftur á morgun að tékka á tækinu þar sem honum virtist það ekki skila alveg því sem það átti að gera. OK gamla tækið hefur þó komist í 80 svo það hefur verið smásjéns að sofa en þetta nýja fór ekki niður fyrir 83 í alla nótt. Alveg hægt að ímynda sér hvernig maður hafði það í hitanum. Nú í morgun fór ég að skoða þetta betur og komst að því að tækið úti var bara alls ekki í gangi svo viftan inni var bara að hringsóla loftinu sem er inni. Ekki nema vona að hitinn lækkaði ekki. Nú er ég búin að koma tækinu úti í gang og vona svo bara að þetta sé allt í góðu lagi, svo ég geti nú farið að sofa betur.

rigning endalaust

Búin að vera hundleiðinleg vika, endalaus rigning og þungbúið. Þetta er bara sama veður og á Íslandi eftir því sem ég heyri þaðan. Ekkert hægt að fara í sund eða á ströndina og eini ljósi púnkturinn er að hægt er með góðri samvisku að sitja og sauma inni. Vona að eitthvað fari að rætast úr þessu án þess að það komi fellibylur á okkur.
Við vorum annars á fyrsta kvöldi bátakúrsins sem er 8 skipti í allt. Það var bara skemmtilegra en ég bjóst við, fullt af fólki og meira að segja strákunum leiddist ekkert þó seinni hlutinn hafi verið svona í lengsta lagi. Ætla að reyna að fá þá til að gera heimverkefnin líka svo þeir læri meira. Palli býst við að koma heim annað kvöld. Jújú. Varðkisi sem alltaf er að væflast hér í kringum húsið er ekki lengur svona hræddur við okkur þó við komum út eða löbbum nálægt honum, er kanski búin að fatta að hann fær kanski eitthvað gott ef hann fer ekki í burtu þegar við sjáumst. Gáfaður kisi.

4. júlí flugeldar

Jæja loksins sást í einhverja flugelda hér í Florida. Eins og þetta var aumt á gamlárskvöld þá var það flott í gær. Fórum með Phil og Libby til vinafólks þeirra sem voru með heilan helling af flugeldum og fullt af fólki. Þeir halda þó allavega almennilega upp á þjóðhátíðardaginn ammrikanar. Palli kom heim á mánudagskvöld og fer í dag aftur til Mobile. Segist koma aftur á þriðjudag, við sjáum það þegar það gerist lol. Ég og strákarnir ætlum að skella okkur á bátanámskeið svo við vitum nú eitthvað um slíkt ef okkur skildi detta í hug að fara að sigla eitthvað. Erum búin að vera að spá í það síðan við komum en ekkert farið enn. Saumaskapurinn er loksins farin í gang aftur eftir ferðalagið. Það var bara allt of heitt í herberginu þar sem acið virkaði ekki almennilega. Það er orðið betra núna sem betur fer, hætt að frjósa í tækinu. Hér er búið að vera frekar leiðinlegt veður, rigning svona annað slagið svo ekki fer maður á ströndina í svoleiðis. Vona að það fari að sjást almennilega í sól.